Cronfa Pensiwn Cymru

Amdanom Ni

Sefydlwyd Partneriaeth Pensiwn Cymru (WWP) yn 2017. Mae Partneriaeth Pensiwn Cymru yn gyfuniad o wyth cronfa Cynllun Pensiwn Llywodraeth Leol (Awdurdodau Cyfansoddol) ledled Cymru ac mae'n un o wyth cronfa genedlaethol ar gyfer Pensiwn Llywodraeth Leol.

Mae gennym hanes hir o gydweithredu llwyddiannus, gan gynnwys enghreifftiau sydd dyddio o'r cyfnod cyn cynllun cyfuno'r Llywodraeth. Rydym yn falch o'n hunaniaeth unigryw fel Cronfa – mae ein Hawdurdodau Cyfansoddol yn cynrychioli ac yn cynnwys Cymru gyfan. Mae bod yn atebol yn ddemocrataidd yn golygu ein bod yn darparu'r gorau o ran llywodraethu cadarn a thryloywder yn y sector cyhoeddus.

Mae ein model gweithredu wedi'i gynllunio i fod yn hyblyg a sicrhau gwerth am arian. Rydym wedi penodi Gweithredwr allanol ac yn defnyddio ymgynghorwyr allanol er mwyn sicrhau'r arbenigwyr gorau i gefnogi'r modd y mae'r Gronfa'n cael ei chynnal. Waystone Management (UK) Limited yw'r Gweithredwr ac mae wedi ymuno â Russell Investments i reoli buddsoddiadau a helpu i leihau costau rheoli buddsoddi ar gyfer yr holl Awdurdodau Cyfansoddol.

Mae gennym weledigaeth glir ac rydym yn rheoli ein gwaith i sicrhau ein bod yn cyflawni ein hamcanion.

Hysbysiadau Diweddaraf

Newyddion Diweddaraf

Dydd Llun 01 Gorffennaf 2024

Mae Waystone Management (UK) Limited yn cael ei ailbenodi fel gweithredwr Partneriaeth Pensiwn Cymru

Mae Partneriaeth Pensiwn Cymru (PPC) yn falch o gyhoeddi bod Waystone Management (UK) Limited (Waystone) wedi'i ailbenodi i weithredu'r gronfa. Ailbenodwyd Waystone yn weithredwr awdurdodedig yr Awdurdod Ymddygiad Ariannol yn dilyn proses gaffael drylwyr gan Bartneriaeth Pensiwn Cymru a'i hymgynghorwyr, Hymans Robertson a Burges Salmon.

Mae pob un o'r 8 Awdurdod Cyfansoddol yng Nghymru eisoes wedi buddsoddi ar y cyd mewn £13bn (fel ar ddiwedd mis Mawrth 2024) o asedau cyfunol gyda Waystone ar draws ystod o strategaethau buddsoddi.

Bydd Waystone, sef y Cyfarwyddwr Corfforaethol Awdurdodedig annibynnol mwyaf yn y DU, yn parhau i weithredu Cynllun Contractiol Awdurdodedig (cyfrwng buddsoddi cyfunol sy'n effeithlon o ran treth y DU) ar ran PPC. Mae gan y Cynllun Contractiol Awdurdodedig ddeg is-gronfa ar draws ecwitïau ac incwm sefydlog sy'n diwallu anghenion yr Awdurdodau, gan eu galluogi i weithredu eu strategaethau dyrannu asedau priodol. Gyda chefnogaeth Russell Investments, bydd Waystone yn parhau i gyflawni arbedion sylweddol o ran ffioedd.

Dywedodd Chris Moore, Cyfarwyddwr Gwasanaethau Corfforaethol Cyngor Sir Caerfyrddin, 'Fel yr awdurdod cynnal ar gyfer Partneriaeth Pensiwn Cymru, rydym wrth ein bodd bod Waystone wedi bod yn llwyddiannus eto ac yn edrych ymlaen at barhau i weithio gyda'r tîm’.

Dywedodd Karl Midl, Pennaeth Gwlad, y Deyrnas Unedig: “Rydym yn falch iawn ein bod wedi cael ein hailbenodi i weithredu fel Gweithredwr i'r Cynllun Contractiol Awdurdodedig er budd cronfa fuddsoddi Partneriaeth Pensiwn Cymru. Mae ein partneriaeth barhaus yn dyst i'r gwasanaeth eithriadol y mae ein tîm wedi'i ddarparu dros y chwe blynedd a hanner diwethaf, ac edrychwn ymlaen at barhau i gefnogi anghenion Partneriaeth Pensiwn Cymru wrth iddynt hefyd barhau i esblygu a thyfu.”

Dywedodd Rachel Wheeler, Pennaeth Cynnyrch Byd-eang Regulated Fund Solutions: “Fel y chwaraewr mwyaf ym marchnad y DU, rydym yn dod â gwytnwch gweithredol heb ei ail, gan sicrhau gwasanaethau cadarn i'n cleientiaid. Mae gennym hanes hir a llwyddiannus o gydweithio â Phartneriaeth Pensiwn Cymru ac rydym yn gyffrous i archwilio cyfleoedd newydd i ehangu ein partneriaeth yn y blynyddoedd i ddod.”

Darllen Fwy

Dydd Gwener 23 Chwefror 2024

Llofnodwr Cod Stiwardiaeth y DU

Mae'n bleser gennym gyhoeddi bod Partneriaeth Pensiwn Cymru (PPC) yn parhau i fod yn un o lofnodwyr Cod Stiwardiaeth y DU.

https://www.frc.org.uk/investors/uk-stewardship-code/uk-stewardship-code-signatories

Mae Cod Stiwardiaeth y DU 2020 yn gosod safonau uchel ar gyfer stiwardiaeth ac mae Partneriaeth Pensiwn Cymru yn ceisio cyrraedd y safonau hyn drwy ei hagwedd at fuddsoddi cyfrifol. Rydym yn falch iawn, felly, ein bod wedi cadw ein statws llofnodwr ar gyfer 2023.

Roedd datblygu Is-Gronfeydd newydd yn ganolbwynt allweddol i'n gwaith dros y flwyddyn, gan gynnwys ein His-gronfa Ecwiti Gweithredol Cynaliadwy, a lansiwyd yn mis Gorffennaf 2023. Gwnaethon hefyd ehangu ein hystod o gronfeydd trwy benodi Dyrannwyr Marchnadoedd Preifat ar draws dyledion preifat, seilwaith a dosbarthiadau asedau ecwiti preifat, ac roeddem hefyd yn falch o ymestyn ein troshaen carbon isel i'n His-gronfa Cyfleoedd y DU.

Mae stiwardiaeth dros ein hasedau hefyd yn hollbwysig, gan weithio'n agos gyda Robeco a Russell Investments i sicrhau bod ein llais yn cael ei glywed. Ar ein rhan, roedd Robeco wedi pleidleisio ar dros 15,000 o benderfyniadau ac wedi cynnal dros 200 o ymgysylltiadau corfforaethol ar draws 20 thema wahanol. Er mwyn hwyluso ein stiwardiaeth, rydym wedi datblygu Fframwaith Stiwardiaeth wedi'i ddiweddaru, sy'n rhoi ffocws ychwanegol ar y themâu a'r pynciau sydd o ddiddordeb i'n haelodau.

Er ein bod yn falch o'n cynnydd eleni, rydym yn cydnabod bod llawer mwy i'w wneud o hyd. Yn ystod y misoedd diwethaf, rydym wedi symud ymlaen â'r gwaith ar strategaeth uwchgyfeirio, ystyried ymhellach sut y gallwn ddatblygu stiwardiaeth yn well o fewn ein dyraniadau goddefol a diweddaru ein polisi benthyca stoc i sicrhau ein bod yn pleidleisio ar ein holl gyfranddaliadau. Gwnaethom hefyd gwblhau ein Hadroddiad Hinsawdd Cymru Gyfan cyntaf, yr ydym yn disgwyl ei gyhoeddi cyn bo hir.

Rydym yn dal i fod yn falch o'n hunaniaeth fel cronfa, lle byddwn yn parhau i ddatblygu ar y cyd â phob un o'r wyth Awdurdod Cyfansoddol yng Nghymru - ac aelodau eu cynlluniau pensiwn - i fod yn stiwardiaid effeithiol o'u hasedau.