Newyddion

Cydnabod Partneriaeth Pensiwn Cymru am Arloesi ym maes ESG

Mae Partneriaeth Pensiwn Cymru (PPC) yn falch iawn o fod wedi cael ei chydnabod am Arloesi ym maes ESG yn sgil ennill y categori hwn yn seremoni Gwobrau Buddsoddi LGC a gynhaliwyd ar 29 Tachwedd 2024.

Mae'r wobr yn dangos bod materion cynaliadwyedd yn parhau i fod yn hollbwysig i PPC a'i hawdurdodau cyfansoddol. Mae'n cydnabod llwyddiant y Gronfa Ecwiti Gweithredol Cynaliadwy, sydd wedi'i datblygu a'i rheoli mewn partneriaeth â Waystone Management UK Ltd a Russell Investments, sydd wedi tyfu i fod yn un o'r cronfeydd buddsoddi cynaliadwy mwyaf o'i math yn y DU.

Mae'r gronfa, a lansiwyd ym mis Gorffennaf 2023, yn dwyn ynghyd yr wyth Awdurdod sylfaenol sy'n rhan o Bartneriaeth Pensiwn Cymru i fuddsoddi gyda'i gilydd mewn modd cynaliadwy am y tro cyntaf. Gan ddefnyddio fframwaith ymchwil trylwyr a dull hyblyg o addasu i themâu cynaliadwyedd sy'n datblygu, mae'r gronfa yn cynnig ateb sy'n cyd-fynd â nodau newid hinsawdd Sero Net wrth ategu'r dyraniadau ecwiti byd-eang presennol.

Fel ein partner gweithredu, mae Russell Investments yn darparu mwy na 50 mlynedd o brofiad o ymchwilio a gwerthuso rheolwyr allanol, gan ddefnyddio mewnbynnau ansoddol a meintiol i ganiatáu cyflawni portffolio aml-reolwr ar y cyd sy'n diwallu anghenion heddiw yn ogystal â gallu bodloni gofynion buddsoddi cynaliadwy yn y dyfodol.

Dywedodd y Cynghorydd Elwyn Williams, Cadeirydd Cyd-bwyllgor Llywodraethu PPC:

"Mae arloesi a chydweithio yn hanfodol i ymateb i'r heriau hollbwysig o ran ESG y mae'r byd yn eu hwynebu heddiw. Rydym yn parhau i fod yn gwbl ymrwymedig i ddarparu'r atebion buddsoddi o'r radd flaenaf er budd ein haelodau ac yn edrych ymlaen at weithio gyda'n partneriaid i fynd i'r afael â materion cynaliadwyedd hanfodol ymhellach.”